У PiS раскол — што гэта можа значыць для нас? Гутарым з сувядоўцам «Зроблена ў Польшчы»
У пятніцу СМІ абвясцілі пра раскол у PiS. Каля 40 прыхільнікаў быўшага прэм&;ера Маравецкага выйшлі з партыі Яраслава Качыньскага — і плануюць развіваць сваю партыю «Развіццё+». Палітычны камітэт PiS павінен сабрацца ў аўторак, каб зацвердзіць іх рашэнне.
Але ці можа раскол найбуйнейшай кансерватыўнай партыі Польшчы прывесці да ўзмацнення пазіцый умоўнага (альбо рэальнага) Гжэгажа Браўна? Dzik спытаў пра гэта ў Кірыла — сувядоўцы падкаста «Зроблена ў Польшчы».
Да чаго тут Гжэгаж Браўн?
Мы ўжо пісалі, што напапярэдадні выбараў PiS усяляк намагаецца адцягнуць галасы ад «Канфедэрацыі» — партыі, якая пакуль не кіравала Польшчай і таму не ўкляпалася ў гучны скандал. Усё ж 15%+ падтрымкі — не дробязь.
«Акрамя таго, ёсць Гжэгаж Браўн, які вельмі небяспечны для ўсіх, у тым ліку PiS, — казаў Dzik-у раней Кірыл. — Бо ёсць такая верагоднасць, што калі «правыя» павернуцца ў Сейм, то ім давядзецца ўступіць у кааліцыю з Браўнам, каб набраць патрэбную парламенцкую большасць.
Гэтага нельга дапусціць, бо гэта будзе азначаць неверагодна вялікі крызіс у адносінах з ЗША. Браўн адмаўляе Халакост (так, Браўн казаў, што газавыя камеры ў Аўшвіцы — гэта фэйк - заўв. Dzika), а Дональд Трамп прызначыў на пасаду амбасадора ЗША ў Польшчы Томаса Роўза, які ходзіць у кіпе».
Цяпер жа, падаецца, моц PiS пахіснулася. Ці дапаможа гэта пану Браўну набраць яшчэ больш працэнтаў падтрымкі?
Меркаванне суразмоўцы
— Сам раскол у PiS — наўрад ці, — лічыць Кірыл. — Агулам мэта Яраслава Качыньскага — аслабляць Гжэгажа Браўна ўсімі магчымымі спосабамі.
На падтрымку Браўна працуюць анты-украінскія і анты-еўрапейскія настроі, плюс расейская дэзынфармацыя. Агулам я працягваю прытрымлівацца меркавання, што ў Браўна ёсць столь (умоўна — каля 10%). І ён, хутчэй за ўсё, не будзе моцна расці. Бо нават калі ёсць фактары, якія дзейнічаюць на рост ягонай падтрымкі, то адначасова з гэтым ёсць іншыя, якія гэты рост стануць гасіць.
Якія? Па-першае, адкрытая прарасейскасць. Па-другое, калі Браўн і яго партыя «Konfederacja Korony Polskiej» пойдуць у Сейм, то яму трэба скласці абшырныя спісы кандыдатаў у дэпутаты. Там сотні прозвішчаў, і гэта будзе такі заапарк, якога Польшча, здаецца, яшчэ ніколі не бачыла: розныя прыхільнікі нават вельмі экзатычных тэорый змовы, розныя людзі з сапраўды экстрэмальнымі поглядамі і інш. І гэтыя людзі пачнуць хадзіць па медыях і дэбатах.
Яшчэ дадам, што ў гэтай сітуацыі варта не забываць — «Канфедэрацыя» Мэнтцэна і Босака працягвае існаваць і працаваць з электаратам далей. У іх значна большыя магчымасці пашырэння падтрымкі, чым у Браўна.
Ну і зноў жа, фактар ЗША. Усе сур&;ёзныя палітычныя сілы Польшчы выдатна разумеюць таксічнасць Браўна, які адмаўляе гісторыю Халакосту і мае адкрыта антысеміцкія погляды. Браўн стварае праблему для ўсіх і нават калі правядзе ў Сэйм некалькі дзясяткаў новых дэпутатаў, то, у залежнасці ад раскладу ў новым Сэйме, тыя ж PiS і «Канфедэрацыя» могуць пачаць працаваць на раздрабленне ягонай фракцыі, выцягваючы адтуль дэпутатаў.
Так, раскол у PiS патэнцыйна можа (але не мусіць) ператасаваць усю палітычную сцэну Польшчы. Варыянтаў развіцця падзей — вялікая колькасць, і верагоднасць тых ці іншых сцэнароў будзе ўвесь час змяняцца, у залежнасці ад дзеянняў канкрэтных палітыкаў і з&;яўлення ў публічнай прасторы новых фактаў. А асабліва — рознага бруду, які ўжо пачаў выкарыстоўвацца ў спрэчках паміж ПіСам і Маравецкім. Апошнія два дні наглядна гэта паказалі.
